Proffiliau Aelodau Bwrdd Gwasanaethau Cyhoeddus


Cynghorydd David Poole, Cadeirydd, Bwrdd Gwasanaethau Cyhoeddus Caerffili, Arweinydd Cyngor Bwrdeistref Sirol Caerffili

Gan astudio'n lleol, addysgwyd y Cynghorydd  Poole yn Ysgol Ramadeg Pontllanfraith ac yna Coleg Crymlyn, Coleg Pont-y-cymer, ac yn olaf, Coleg Alltyryn yng Nghasnewydd.

Cychwynnodd y Cynghorydd Poole ei yrfa ym maes peirianeg yn y sector preifat,  ac yn ddiweddarach, ymunodd â Llywodraeth Leol yn 1973 fel Swyddog Gwasanaethau Rheoli Cyd Uned Rheoli Gwasanaethau CDT Caerffili a CDT Gelligaer.

Yn dilyn ad-drefnu llywodraeth leol yn 1974, cafodd y Cynghorydd Poole  nifer o ddyrchafiadau, ac yn y pen draw, daeth yn Rheolwr Cyffredinol DLO/DSP Cyngor Dosbarth Trefol Cwm Rhymni, ac yn 1996, daeth yn Bennaeth Gwasanaethau Cyhoeddus yng Nghyngor Bwrdeistref Sirol newydd Caerffili, cyn ymddeol yn 2000.

Cychwynnodd y Cynghorydd Poole ei yrfa wleidyddol yn 2004, ar ôl cael ei ethol yn aelod lleol ward Pengam,  a bu'n Aelod o'r Cabinet â chyfrifoldeb am yr Amgylchedd a Thai tan 2008, ac mae bellach yn Arweinydd y Cyngor.

Mae'r Cynghorydd Poole yn aelod gweithgar o'i gymuned leol, ac  mae'n aelod o nifer o grwpiau.  Bydd yn mynd ar batrolau yn rheolaidd ar y cyd â'r hedldu, a bydd hefyd yn cynnal cymorthfeydd misol mewn partneriaeth â'r heddlu.

Mae'n dilyn chwaraeon yn selog, ac yn mwynhau gwylio gemau rygbi lleol a rhyngwladol. Yn ei amser hamdden, bydd yn mwynhau teithio, ac mae wedi ymweld â phob cyfandir ac eithrio Antarctica.



Judith Paget, Chief Executive, Aneurin Bevan Health Board

Judith Paget, Prif Weithredwr
Bwrdd Iechyd Aneurin Bevan

Mae Judith yn gweithio i'r GIG ers 1980. Yn ystod y 1980au, fe gafodd hi nifer o swyddi gweithredol mewn ysbytai yn ardal Gwent, a gadawodd Gwent yn 1990 pan gafodd swydd yn Awdurdod Iechyd Dwyrain Dyfed.

Maes o law, cafodd ei phenodi yn Gyfarwyddwr Cynllunio Ymddiriedolaeth GIG Llanelli Dinefwr, ac arhosodd yno tan 1996 pan ymunodd ag Awdurdod Iechyd Morgannwg i sefydlu'r Tîm Bro ym Mhen-y-bont ar Ogwr.

Yn 2000, dychwelodd Judith i Went fel Rheolwr Cyffredinol Grŵp Iechyd Lleol Caerffili, ac ar ôl hynny, cafodd ei phenodi yn Brif Weithredwr Bwrdd Iechyd Lleol Caerffili. Yn Awst 2007, cafodd ei phenodi yn Brif Swyddog Gweithredol Bwrdd Iechyd Lleol Addysgu Powys, a gwnaeth y gwaith hwnnw tan fis Hydref 2009.

Ymunodd Judith â Bwrdd Iechyd Aneurin Bevan fel Cyfarwyddwr Cynllunio a Gweithrediadau yn Hydref 2009, ac wedyn, daeth yn Brif Swyddog Gweithredu/Dirprwy Brif Swyddog Gweithredol y Bwrdd Iechyd.  Penodwyd Judith yn Brif Swyddog Gweithredol y Bwrdd Iechyd ym Mehefin 2014, a chafodd ei phenodi yn Brif Weithredwr y Bwrdd yn Hydref 2014.

Cafodd Judith Gwmnïaeth Sefydliad y Rheolwyr Gwasanaethau Iechyd yn 2012. Fe wnaeth Judith hefyd ennill 'Gwobr Cyfarwyddwr ym maes Gwasanaeth Cyhoeddus - Sefydliad y Cyfarwyddwyr' Cymru 2014.


 

Christina Harrhy, Interim Chief Executive, Caerphilly County Borough Council

 

 

Christina Harrhy, Prif Weithredwr Dros Dro

Cyngor Bwrdeistref Sirol Caerffili

Ymunodd Christina â Thîm Rheolaeth Gorfforaethol Cyngor Bwrdeistref Sirol Caerffili yn 2015 fel Cyfarwyddwr Corfforaethol dros Gymunedau, wedi dros 25 mlynedd o brofiad ym maes llywodraeth leol, cyn cychwyn gweithio fel Prif Weithredwr Dros Dro yn Ionawr 2018.

Magwyd Christina yng Nghaerffili ac fe'i haddysgwyd hi yn Ysgol Genethod Lewis, Ystrad Mynach, cyn astudio i ddod yn Beiriannydd Sifil Siartredig a Chymrawd Sefydliad y Peirianwyr Sifil a Chymrawd Sefydliad Siartredig Priffyrdd a Chludiant.

Cychwynnodd ei gyrfa gynnar yng Nghyngor Sir Morgannwg Ganol fel Technegydd ac yna fel Arolygydd Priffyrdd. Yn dilyn ad-drefnu llywodraeth leol, ymunodd â Chyngor Caerffili fel Peiriannydd Cynorthwyol. Yn ddiweddarach, ymunodd â Chyngor Sir Torfaen a bu yno am 14 mlynedd a gwnaeth nifer o swyddi rheoli cyn dod yn Gyfarwyddwr.

Yn 2010, penderfynnodd Christina ehangu ei gorwelion a chychwyn astudio am radd arall, Gradd Meistr y tro hwn mewn Gweinyddu Cyhoeddus ym Mhrifysgol Caerdydd, cyn teithio i'r Unol Daleithiau i astudio Arweinyddiaeth, ym Mhrifysgol glodfawr Harvard yn Boston.

Yn dilyn ennill ei gradd Meistr, ac ychwanegu at ei gwybodaeth a'i phrofiad eithriadol, mae Christina wedi datblygu ac arwain timau sy'n perfformio'n rhagorol ac wedi datblygu rhaglen gradd Meistr arobryn, arloesol a seiliedig ar werthoedd ym maes Arweinyddiaeth mewn Gwasanaethau Cyhoeddus.   I gydnabod llwyddiant y rhaglen, a'i chyfraniad cyffredinol at arweinyddiaeth ym maes gwasanaethau cyhoeddus, cyflwynwyd Gwobr Arweinydd y Dyfodol Arwain Cymru iddi hi yn 2011.

Mae Christina yn byw yn Sir Fynwy gyda'i gŵr a'i merch, ac yn ei hamser hamdden, bydd yn mwynhau teithio a beicio.



Cllr Tudor Davies, Caerphilly CBCCynghorydd Tudor Davies, Cyngor Bwrdeistref Sirol Caerffili

Cadeirydd Awdurdod Tân ac Achub De Cymru

Mae'r Cynghorydd  Tudor Davies yn aelod o Awdurdod Tân ac Achub De Cymru ers 17 mlynedd ac yn Gadeirydd ers 4 blynedd.  Cychwynnodd ei yrfa wleidyddol yn 1979 yng Nghyngor Dosbarth Cwm Rhymni, a bu'n Gadeirydd yn 1998-99. Mae'n falch o barhau i gynrychioli ward Bargoed fel aelod ers tro byd o Gyngor Bwrdeistref Sirol Caerffili.

Mae wedi cael nifer o swyddi allweddol ar nifer o bwyllgorau dros y blynyddoedd, ac yn ogystal â'i gyfrifoldebau yng Nghyngor Bwrdeistref Sirol Caerffili, mae'n Llywydd Home Start Caerffili ac yn un o Ymddiriedolwyr Cyngor i Bopeth Caerffili a Disability Can Do.

Fel Cadeirydd Awdurdod Tân ac Achub De Cymru, bydd y Cynghorydd  Davies yn mynychu cyfarfodydd rheolaidd â Gweinidogion Llywodraeth Cymru ar ran yr Awdurdod.   Bydd yn mynychu cyfarfodydd y Pwyllgor Materion Cenedlaethol ar ran 3 Awdurdod Tân Cymru, yn trafod â Swyddogion a Rhanddeiliaid ynghylch materion beunyddiol, ac yn cael cyfarfodydd â Chyrff Statudol y Gwasanaethau Goleuadau Glas eraill, a chyfarfodydd ag Awdurdodau Lleol hefyd.  Fel Cadeirydd, bydd y Cynghorydd  Davies hefyd yn ymweld yn rheolaidd â Gorsafoedd y Gwasanaeth Achub a Thân o fewn yr Awdurdod.  Roedd hefyd yn Gadeirydd blaenorol hen Gyngor Iechyd Cymuned Gwent

Mae'r Cynghorydd  Davies yn credu ei fod yn bwysig ymgysylltu â'r gymuned gyfan, pobl ifanc a henoed fel ei gilydd, ac mae'n falch o fod yn un o Lywodraethwyr Ysgol Gyfun Heolddu ac Ysgol Gynradd y Parc.

Mae ei ddiddordebau amser hamdden yn cynnwys Clwb Bowlio Bargoed, ac mae'n Llywydd y clwb hwnnw. Mae hefyd yn mwynhau gwylio pob mathau o chwaraeon.

Mae'r Cynghorydd  Davies yn briod â'i wraig Margaret ers 58 mlynedd, ac mae ganddynt 4 o blant, 13 o wyrion ac wyresau, ac 16 o or-wyrion a gor-wyresau.


Martin Featherstone, Chief Executive, GAVO

Martin Featherstone, Chief Executive
Cymdeithas Mudiadau Gwirfoddol Gwent

Penodwyd Martin Featherstone yn Brif Swyddog Gweithredol Cymdeithas Mudiadau Gwirfoddol Gwent ym Mehefin 2013.

Magwyd Martin yng Nghymru, ar fryn a leolir oddeutu saith milltir o Aberhonddu.  Gadawodd Gymru i ddilyn cyrsiau Addysg Uwch a chanfod cyfleoedd am gyflogaeth.  Mae wedi dychwelyd yn rheolaidd i Gymru i gwrdd â theulu a ffrindiau, a gweithiodd yng Nghymru yng Ngholeg Powys ac yn Awdurdod Parc Cenedlaethol Bannau Brycheiniog.

Mae Martin wedi ennill Diploma Uwchraddedig mewn Astudiaethau Rheolaeth a Gradd mewn Rheoli Hamdden.

Yn ei amser hamdden, bydd Martin yn mwynhau cerdded bryniau a chrwydro cefn gwlad, ac fel arfer, bydd ganddo brosiect gwaith coed ar y gweill.


Jeff Farrar, Chief Constable

 

Julian Williams, Prif Gwnstabl
Heddlu Gwent 

Julian Williams yw Prif Gwnstabl Heddlu Gwent, a chyn hynny, gwasanaethodd yn Heddlu De Cymru tan 2014.  Ymunodd Julian â Heddlu Gwent ar secondiad fel Prif Gwnstabl Cynorthwyol Dros Dro, a chafodd ei benodi'n barhaol i'r swydd honno yn 2015. Yna, cafodd ei ddyrchafu'n Ddirprwy Brif Gwnstabl cyn cael ei ddyrchafu'n Brif Gwnstabl ar 1 Awst 2017.

Mae'n gwasanaethu fel heddwas ers 28 mlynedd, yn cynnwys 25 yn Heddlu De Cymru.  Pan oedd yn gweithio i Heddlu De Cymru, gwasanaethodd yn y Bari, Penarth, Caerdydd, Castell-nedd, Port Talbot, Abertawe a'r Pencadlys ym Mhen-y-bont ar Ogwr.   Mae ei gefndir ym maes plismona gweithredol, ac fel Prif Uwch-arolygydd, roedd yn Gomander Rhanbarthol Rhanbarth y Gorllewin, gan gwmpasu Abertawe, Castell-nedd a Phort Talbot. Cyn gadael Heddlu De Cymru, roedd yn Brif Gwnstabl Cynorthwyol Dros Dro ar gyfer gweithredoedd arbenigol.

Mae'n ddigon ffodus i fod wedi cael y profiad o fod yn Gomander yng ngemau pêl-droed y Gemau Olympaidd yn Stadiwm y Mileniwm yn 2012.  Mae hefyd wedi rheoli nifer o ddigwyddiadau amlwg hefyd yn y llu, gan gynnwys 2 gêm bêl-droed rhwng Abertawe a Dinas Caerdydd.  Fel Prif Gwnstabl Cynorthwyol a Dirprwy Brif Gwnstabl Heddlu Gwent, roedd yn gyfrifol am yr Uned Arfau Tanio ar y Cyd, sy'n ymateb i ddigwyddiadau arfau tanio ledled ardaloedd plismona Heddlu Gwent, Heddlu De Cymru a Heddlu Dyfed Powys.

Ef yw arweinydd plismona Caethwasiaeth Fodern a Masnachu Pobl yng Nghymru ac mae'n rhan o'r Grŵp Gwrthderfysgaeth Cenedlaethol, ar ôl bod yn Gomander Arfau Tanio am 15 mlynedd.

Mae ei ddiddordebau ym maes chwaraeon yn bennaf. Mae wedi bod yn ddigon ffodus i gynrychioli tîm rygbi Heddlu De Cymru am nifer o flynyddoedd yn ogystal â thîm rygbi Heddlu Prydain.   Mae'n un o gefnogwyr brwd Clwb Pêl-droed Abertawe.



Ceri Davies, Diretor of Knowledge, Strategy and Planning, Natural Resources WalesSteve Morgan, Ar hyn o bryd, Steve yw Pennaeth Gweithrediadau, De Cymru yng Nghyfoeth Naturiol Cymru (CNC)

Mae ganddo radd mewn Sŵoleg gyda Sŵoleg Forol o Brifysgol Bangor ac mae'n Rheolwr Siartredig Dŵr a’r Amgylchedd ac yn Amgylcheddydd Siartredig.

Mae ganddo 27 mlynedd o brofiad yn gweithio yn y sector amgylcheddol cyhoeddus (gan gynnwys yr Awdurdod Afonydd Cenedlaethol ac Asiantaeth yr Amgylchedd Cymru) a bu'n gweithio am gyfnod byr yn y Gymdeithas Cadwraeth Forol.

Mae Steve yn arwain timau gweithredol De-ddwyrain Cymru (ardal awdurdodau lleol Gwent) yn CNC sydd â chylch gorchwyl eang gan gynnwys cadwraeth, bioamrywiaeth, rheoli tir a dŵr, risg llifogydd, coedwigaeth, rheoleiddio diwydiant, monitro a physgodfeydd. Mae ganddo ddiddordeb penodol mewn sicrhau bod ein hamgylchedd yn cael ei ddiogelu er mwyn i bawb gael ei fwynhau a helpu i wella lles pobl Cymru.

Mae gan Steve gariad am yr awyr agored a phan na fydd yn chwarae sboncen yn ei glwb lleol, fe ddowch o hyd iddo yn cerdded mynyddoedd Cymru gyda'i gamera a'i drybedd wrth law.

Pwrpas Cyfoeth Naturiol Cymru yw gweithio tuag at reoli adnoddau naturiol yn gynaliadwy yn ei holl waith. Mae hyn yn golygu edrych ar ôl aer, tir, dŵr, bywyd gwyllt, planhigion a phridd i wella lles Cymru, a darparu dyfodol gwell i bawb.



Jeff Cuthbert, Police and Crime Commissioner for GwentJeff Cuthbert, Bsc, MCIPD,
Comisiynydd Heddlu a Throseddu Gwent

Hanes Personol

Ganwyd Jeff yng Nglasgow, a symudodd i Gaerdydd gyda'i rieni, ac yno, cafodd ei addysgu yn Ysgol Uwchradd Fodern yr Eglwys Wen. Enillodd Radd mewn Peirianneg Mwyngloddio yng Ngholeg y Brifysgol, Caerdydd

Cefndir Proffesiynol

Cychwynnodd Jeff ei yrfa yn y diwydiant mwyngloddio, ac yn ddiweddarach, gweithiodd i Gydbwyllgor Addysg Cymru fel Pennaeth yr Uned Ased i'r Diwydiant.

Yn flaenorol, roedd yn aelod o Fwrdd Llywodraethwyr Ysgol Cae'r Drindod, y Llys ym Mhrifysgol Caerdydd a Bwrdd Rheolwyr Coleg Ystrad Mynach.  Mae Jeff yn un o Aelodau Corfforaethol Sefydliad Siartredig Personél a Datblygu.

Hanes Gwleidyddol

Etholwyd Jeff yn aelod o'r Cynulliad am y tro cyntaf yn 2003.

Cyn ei benodi yn Ddirprwy Weinidog dros Sgiliau ym Mai 2011, gwasanaethodd Jeff fel Cadeirydd Pwyllgor Monitro Rhaglen Cronfeydd Strwythurol Cymru Gyfan.  Sefydlodd a chadeiriodd y Grŵp Trawsbleidiol ynghylch yr Amgylchedd Adeiledig, y Grŵp Trawsbleidiol ynghylch Byw yn Iach, y Grŵp Trawsbleidiol ynghylch Diabetes, a chydsefydlodd a chydgadeiriodd y Grŵp Trawsbleidiol ynghylch Cwrw a Thafarnau. Roedd hefyd yn aelod o Bwyllgor Gwaith Cangen Cymru o Gymdeithas Seneddol y Gymanwlad.  Cadeiriodd Jeff y Pwyllgor Safonau Ymddygiad ac mae wedi bod yn aelod o'r Pwyllgor Materion Ewropeaidd ac Allanol, y Pwyllgor Menter a Dysgu, a'r Pwyllgor Cyfrifon Cyhoeddus.

Ym Mai 2013, penodwyd Jeff yn Weinidog dros Gymunedau a Threchu Tlodi.  Gwnaeth y gwaith hwn tan fis Medi 2014, ac yn ystod ei gyfnod wrth y gwaith, cyflwynodd Fil Llesiant Cenedlaethau'r Dyfodol (Cymru).

Etholwyd Jeff yn Gomisiynydd Heddlu a Throseddu Gwent ym Mai 2016 am gyfnod o bedair blynedd.

Cysylltiadau

Mae Jeff yn aelod o Undeb UNITE a bu'n gydlynydd grwp UNITE o Aelodau Cynulliad Llafur cyn cael ei benodi gan Brif Weinidog Cymru yn Ddirprwy Weinidog dros Sgiliau.


Huw Jakeway, Chief Fire Officer, South Wales Fire & Rescue ServiceHuw Jakeway, MSc, FIFireE, Prif Swyddog Tân
Gwasanaeth Tân ac Achub De Cymru

Ymunodd Huw â'r Gwasanaeth Tân ac Achub yn 1990, ac mae wedi gweithio ym mhob rheng ac adran y Gwasanaeth. Ychydig ar ôl datganoli'r cyfrifoldeb am y gwasanaeth tân ac achub i Lywodraeth Cymru, cafodd Huw ei secondio yn 2005 i weithio i Lywodraeth Cynulliad Cymru fel Cynghorydd Polisi, Gweithredol a Thechnegol.

Penodwyd Huw yn Brif Swyddog Tân Cynorthwyol yn 2009, ac roedd ei bortffolio yn cynnwys y Fflyd a Pheirianneg, Arloesi a Gwella, Iechyd a Diogelwch, Prosiectau Arbennig, Cydnerthedd a Chynllunio, a Datblygu ac Adolygu.

A 14 Mawrth 2011, penodwyd Huw yn Ddirprwy Brif Swyddog Tân, ac yn Gyfarwyddwr Cyflawni Gwasanaethau gan arwain ym meysydd Gweithrediadau, Lleihau Risgiau, Rheoli Tannau a Rheoli Perfformiad.  Yn rhinwedd y swydd hon, roedd Huw yn arwain y gwaith o gyd-drafod â'r gweithlu ar ran y Gwasanaeth.

Ar 1 Rhagfyr 2011, daeth Huw yn Brif Swyddog Tân Gweithredol, a chadwodd ei gyfrifoldebau. Fel Cyfarwyddwr Lleihau Risgiau, roedd yn arwain ym meysydd Diogelwch Tân a Phartneriaethau Cymunedol, Diogelwch Tân Deddfwriaethol a Rheoli Perfformiad.

Ar 28 Medi 2012, penodwyd Huw yn Brif Swyddog Tân gan Awdurdod Tân ac Achub De Cymru.

Yn 2005, enillodd Huw radd MSc mewn Rheolaeth Gyhoeddus ym Mhrifysgol Morgannwg, a chwblhaodd Raglen Arweinyddiaeth Weithredol y Gwasanaeth Tân ac Achub yn Ysgol Fusnes Warwick yn 2010.

Fel aelod o'r Grwp Arweinyddiaeth ym maes Gwasanaethau Cyhoeddus yn 2013, cafodd Huw y gwaith o wella rhannu data a gwybodaeth ledled Cymru gan y Gweinidog oedd yn gyfrifol am wasanaethau cyhoeddus bryd hynny.  Mae hyn wedi arwain at dros 46 o Arweinyddion Gwasanaethau Cyhoeddus yn llofnodi'r addewid gan arweinyddion, sy'n arwydd o'u cefnogaeth hwy a'u sefydliad i'r gwaith o annog rhannu gwybodaeth a data personol mewn modd cyfreithlon, teg, cytbwys a diogel.


Diana BindingDiana Binding, Prif Weithredwr Cynorthwyol

Cwmni Adsefydlu Cymunedol (WCRC) yng Ngwent

Mae WCRC yn cydweithio ag oddeutu 8,000 o droseddwyr risg isel a chanolig sydd wedi'u dedfrydu gan y llysoedd i gyflawni gorchymyn cymunedol, gorchymyn dedfryd ohiriedig, neu wedi cael eu rhyddhau o garchar ar drwydded i dreulio gweddill eu dedfryd yn y gymuned.

Mae WCRC yn darparu amrywiaeth helaeth o wasanaethau prawf i helpu i leihau aildroseddu a gwarchod y cyhoedd rhag niwed, rheoli dedfrydau cymunedol troseddwyr a sicrhau fod ganddynt y wybodaeth, y sgiliau a'r cymorth sy'n ofynnol i'w galluogi i roi'r gorau i droseddu.

Mae Diana yn gweithio yn y Gwasanaeth Prawf ers dros 35 mlynedd mewn amrywiaeth o leoliadau, yn cynnwys 5 mlynedd fel swyddog prawf yn HMP Holloway. Cyn symud i Ymddiriedolaeth Prawf Cymru yn 2012, roedd hi'n gweithio i Ymddiriedolaeth Prawf Llundain. Mae hi hefyd wedi gweithio yn y sector preifat.


James Owen

James Owen, Dirprwy Gyfarwyddwr, Cyllid a Gwasanaethau Corfforaethol 

Llywodraeth Cymru

Ymunodd James â'r Gwasanaeth Sifil trwy'r llwybr carlam yn 2001, ac ers hynny, mae wedi gwneud amrywiaeth o swyddi arwain allweddol i Lywodraethau Cymru a'r Deyrnas Unedig.

Cychwynnodd James ei yrfa fel Clerc Pwyllgorau yng Nghynulliad Cenedlaethol Cymru, ac yna, ymunodd â swyddfa'r Cabinet fel rhan o ymdrech Llywodraeth y Deyrnas Unedig i wella cydnerthedd wedi 9-11.

Dychwelodd James i Gymru yn 2005 i gyflawni amrywiaeth o brosiectau adnoddau dynol fel rhan o'r uno a ddigwyddodd rhwng nifer o gyrff cyhoeddus anadrannol â Llywodraeth Cymru. Yna, arweiniodd Raglen hynod lwyddiannus y Strategaeth Leoli, prosiect cyfalaf yn ymwneud â newid sefydliadol sylweddol, adeiladu dwy swyddfa newydd ac ail-leoli oddeutu 1000 o staff ledled Cymru.

Ar hyn o bryd, mae James yn gyfrifol am y fframwaith strategol yn ymwneud ag ymagwedd Llywodraeth Cymru at Adnoddau Dynol a Rheoli Gwybodaeth a Hysbysrwydd, yn cynnwys ymdrechion llwyddiannus yn ddiweddar i weithredu system rheoli gwybodaeth ar gyfer holl swyddogaethau cwmnïau.


Heather Nicholls, Pennaeth Uned Cyflawni Lleol

y Gwasanaeth Prawf Cenedlaethol, Gwent

Ar hyn o bryd, mae'r Gwasanaeth Prawf Cenedlaethol, Gwent, yn goruchwylio tua 1,200 o droseddwyr yn y gymuned ac yn y ddalfa. Mae'n rheoli'r troseddwyr hynny sydd, yn ôl asesiad, yn wynebu risg uchel o niwed difrifol ar ddechrau eu dedfryd. Mae staff y Gwasanaeth Prawf Cenedlaethol yn ymgymryd ag asesiadau risg a gwaith cynllunio ar gyfer rheoli risg, ac yn sicrhau bod y troseddwyr hyn yn cael yr ymyriadau sydd eu hangen, naill ai ar ffurf un i un neu mewn lleoliadau grŵp, er mwyn ‘Atal Dioddefwyr trwy Newid Bywydau’.

Ers graddio yn 2000 â Gradd mewn Seicoleg, bu Heather yn gweithio i Wasanaeth Erlyn y Goron yn y lle cyntaf. Dechreuodd weithio i'r Gwasanaeth Prawf yn 2002, gan ddechrau fel Swyddog Gwasanaeth Prawf, yna fel Swyddog Prawf dan Hyfforddiant, Swyddog Prawf, Rheolwr Tîm, a Dirprwy Bennaeth yr Uned Cyflawni Lleol. Mae wedi bod yn ei swydd bresennol, fel Pennaeth Dros Dro yr Uned Cyflawni Lleol, ers mis Mai 2018. Mae Heather wedi gweithio ledled Gwent yn ystod ei gyrfa yn y Gwasanaeth Prawf.

 

 

 

 

Website by Andy Grant